धरान । धनकुटाको एक भीषण बस दुर्घटनामा मृत्यु हुनेको संख्या तीन पुगेको छ।
सोमबार बिहान धरानबाट भोजपुरतर्फ जाँदै गरेको यात्रुवाहक बस ब्रेक फेल भई करिब ५० मिटर तल खस्दा दुर्घटना भएको हो। को १ ख २१७७ नम्बरको उक्त बस बिहान करिब १०:१० बजे अनियन्त्रित भएर सडकबाट तल खसेको थियो। दुर्घटनामा भोजपुर घर भई हाल धनकुटामा बस्दै आएकी ७३ वर्षीया कृष्णकुमारी राई भुजेलको जिल्ला अस्पताल धनकुटामा उपचारका क्रममा मृत्यु भएको धनकुटा प्रहरीले जनाएको छ।
त्यस्तै, गम्भीर घाइते दुई जनाको धरानस्थित बीपी कोइराला स्वास्थ्य विज्ञान प्रतिष्ठानमा उपचारका क्रममा मृत्यु भएको पुष्टि गरिएको छ। उक्त दुर्घटनामा १४ जना यात्रु घाइते भएका छन्। उनीहरूमध्ये केहीको अवस्था गम्भीर रहेको जनाइएको छ।
घटनाको अनुसन्धान जारी रहेको र आवश्यक थप जानकारी संकलन भइरहेको प्रहरीले जनाएको छ।
प्रतिक्रिया