काठमाडौं । आइतबार भएको इन्डियन प्रिमियर लिग (आईपीएल)को दोस्रो खेलमा पञ्जाब किङ्सले लखनउ सुपर जायन्ट्सलाई ३७ रनले पराजित गर्दै महत्वपूर्ण जित हात पारेको छ ।
यस जितसँगै पञ्जाब प्लेअफको दौडमा थप मजबुत बनेको छ र अंक तालिकामा दोस्रो स्थानमा उक्लिएको छ । टस हारेर पहिले ब्याटिङ गरेको पञ्जाबले निर्धारित २० ओभरमा ५ विकेटको क्षतिमा २३६ रनको विशाल स्कोर बनायो । ओपनर प्रभसिमरन सिंहले ४८ बलमा ९१ रनको शानदार पारी खेले, जसमा उनले ६ चौका र ७ छक्का प्रहार गरे ।
कप्तान श्रेयस अय्यरले ४५ रन, शशांक सिंहले अविजित ३३ र जोश इंग्लिसले ३० रन जोडे । अन्त्यमा मार्कस स्टोइनिसले ५ बलमा १५ रनको विस्फोटक फिनिशिङ गरे । लक्ष्य पछ्याउँदै मैदान उत्रिएको लखनउ सुपर जायन्ट्सले २० ओभरमा ७ विकेट गुमाएर १९९ रन मात्र बनाउन सक्यो । सुरुवाती ओभरमै टप अर्डर धरासायी भएपछि लखनउ खेलमै पछि पर्यो ।
अर्शदीप सिंहले शानदार बलिङ गर्दै लखनउका शीर्ष ३ ब्याटर—मिचेल मार्श, एइडन मार्क्रम र निकोलस पूरनलाई पवेलियन फर्काए । उनले ४ ओभरमा १६ रन दिँदै ३ विकेट लिए । ओमरजाइले २ विकेट तथा यानसेन र चहलले १-१ विकेट लिए । लखनउका लागि आयुष बदोनीले सर्वाधिक ७४ रन बनाए भने अब्दुल समदले ४५ रनको योगदान गरे ।
कप्तान पन्तले १८ रन बनाउँदा आवेश खान १९ रनमा अविजित रहे । लखनउका बलर आकाश सिंह र दिग्वेश राथीले २-२ विकेट लिए भने प्रिन्स यादवले १ विकेट लिए । यस जितपछि पञ्जाबको ११ खेलबाट १५ अंक पुगेको छ र ऊ दोस्रो स्थानमा उक्लिएको छ ।
भने ११ खेलमा १० अंकमात्रै जोडेको लखनउ तालिकाको सातौं स्थानमा झरेको छ, जसले गर्दा उसको प्लेअफ सम्भावना थप कमजोर बनेको छ ।
प्रतिक्रिया