एजेन्सी । इन्डियन प्रिमियर लिग (आईपीएल) २०२५ मा चेन्नई सुपर किङ्सको यात्रा यस वर्ष यतिमै अन्त्य भएको छ ।
बुधबार पञ्जाब किङ्ससँग ४ विकेटको हार बेहोरेसँगै चेन्नई प्लेअफ सम्भावनाबाट बाहिरिएको हो । १० खेलमध्ये ८ हार व्यहोरेको चेन्नईले अब बाँकी खेलले समग्र अंकतालिकामा खास असर पार्ने छैन । यसैबीच, छैटौं जित निकाल्दै पञ्जाब भने शीर्ष चारको दौडमा बलियो बनिरहेको छ । १९१ रनको चुनौती पाएको पञ्जाबले १९.४ ओभरमा ६ विकेट गुमाउँदै लक्ष्य पूरा गर्यो ।
कप्तान श्रेयस अय्यरले उत्कृष्ट ब्याटिङ गर्दै ७२ रन बनाएर टोलीलाई जितसम्म पुर्याए । ओपनर प्रभसिमरन सिंहले ५४ रन जोडे भने प्रियान्श आर्या र शशांक सिंहले समान २३ रनको योगदान दिए । चेन्नईका बलरमध्ये मथिसा पथिराना र खलील अहमदले २–२ विकेट लिए भने नूर अहमद र रविन्द्र जडेजाले १–१ विकेट हात पारे ।
यसअघि टस गुमाएर पहिले ब्याटिङ गरेको चेन्नईले १९.२ ओभरमा सबै विकेट गुमाउँदै १९० रन बनाएको थियो । कुनै बेला २०० रन पार गर्ने सम्भावनामा देखिएको चेन्नईको इनिङ अन्त्यतिर ढल्यो । साम करानले सर्वाधिक ८८ रन बनाए भने डेवाल्ड ब्रेभिसले ३२ रन र जडेजाले १७ रन बनाए ।
१८औं ओभरमा करान आउट भएपछि क्रिजमा आएका एमएस धोनीले एक चौका र एक छक्का प्रहार गरे पनि लामो समय टिक्न सकेनन् । युजवेन्द्र चहलले धोनीलाई क्याच आउट गराउँदै त्यसपछि लगातार तीन बलमा विकेट लिँदै ह्याट्रिक पुरा गरे । उनले ४ ओभरमा २९ रन दिँदै ४ विकेट लिए ।
पञ्जाबका अन्य बलर अर्शदीप सिंह र मार्को यानसेनले २–२ विकेट लिए भने हरप्रीत ब्रार र अजमतुल्लाह ओमरजाइले १–१ विकेट झारे । यस जितसँगै १० खेलमा १३ अंक बनाउँदै पञ्जाब तालिकाको दोस्रो स्थानमा उक्लिएको छ भने चेन्नई ४ अंकसहित पुछारमा रहेको छ ।
प्रतिक्रिया