काठमाडौं । रोयल च्यालेन्जर्स बेंगलुरुले इन्डियन प्रिमियर लिग (आईपीएल) क्रिकेटमा छैटौं जित निकाल्दै अंकतालिकामा आफ्नो स्थिति मजबुत बनाएको छ।
बिहीबार सम्पन्न खेलमा बेंगलुरुले राजस्थान रोयल्समाथि ११ रनको रोमाञ्चक जित दर्ता गरेको हो। बेंगलुरुले पहिले ब्याटिङ गर्दै २० ओभरमा ५ विकेटको क्षतिमा २०५ रन बनाएको थियो। कप्तान विराट कोहलीले ७० रनको आकर्षक इनिङ्स खेले भने देवदत्त पडिक्कलले पनि अर्धशतक (५० रन) जोडे। ओपनर फिलिप साल्टले २३ रन बनाए भने टिम डेभिडले २३ रनमा अविजित रहेर योगदान गरे।
जवाफमा राजस्थानले २० ओभरमा ९ विकेट गुमाउँदै १९४ रन मात्र बनाउन सक्यो। यशस्वी जैसवालले ४९ रन बनाए भने ध्रुव जुरेलले ४७ रनको संघर्षपूर्ण इनिङ्स खेले। नितिश रानाले पनि २८ रन जोड्दा राजस्थान जितको नजिक पुगेको थियो, तर अन्तिम क्षणमा लय गुमायो। शक्तिशाली सुरुवातपछि पनि राजस्थानले फिनिसिङ गर्न सकेन। पावरप्लेमै ७२ रन जोडेको टोलीले १० ओभरपछि ११३-३ को अवस्था बनाए पनि अन्तिम ओभरहरूमा दबाबमा आयो।
अन्तिम तीन ओभरमा ४० रन आवश्यक परेको अवस्थामा १८औं ओभरमा २२ रन आए पनि जोश हेजलवूडले १९औं ओभरमा केवल १ रन दिएर २ विकेट झारेपछि बेंगलुरुको जित सुनिश्चित भयो। बेंगलुरुका लागि हेजलवूडले उत्कृष्ट प्रदर्शन गर्दै ४ ओभरमा ३३ रन दिँदै ४ विकेट लिए। क्रुनाल पान्ड्याले २ विकेट झारे भने भुवनेश्वर कुमार र यश दयालले समान १-१ विकेट लिए।
राजस्थानका लागि सन्दीप शर्माले २ विकेट लिए भने वानिन्दु हसरंगा र जोफ्रा आर्चरले १-१ विकेट लिए। यो जितसँगै बेंगलुरुले ९ खेलमा १२ अंक जोडेर तालिकाको तेस्रो स्थानमा उक्लिएको छ। यता, लगातार हार भोगिरहेको राजस्थान भने ९ खेलमा ४ अंक मात्र जोडेर आठौं स्थानमा सीमित भएको छ।
यससँगै राजस्थानको प्लेअफ यात्रा निकै चुनौतीपूर्ण बनेको छ।
प्रतिक्रिया