कक्षा १२ को परीक्षा तोकिएको मितिमै हुने

काठमाडौं । राष्ट्रिय परीक्षा बोर्डले कक्षा १२ को वार्षिक परीक्षा तोकिएकै मितिमा सञ्चालन गर्ने निर्णय गरेको छ।

बोर्डको मंगलबार बिहान बसेको बैठकले हालको आन्दोलनका बाबजुद परीक्षा तालिका यथावत् राख्ने स्पष्ट पारेको हो। शिक्षकहरू शिक्षा ऐन जारी गर्न माग गर्दै आन्दोलनरत रहेका कारण वैशाख ११ गतेदेखि सुरु हुने भनिएको परीक्षा सम्बन्धी अन्योल उत्पन्न भएको थियो।

शिक्षक महासंघको आह्वानमा चैत २० गतेदेखि शिक्षकहरू सडकमा उत्रिएका छन्।

तर बोर्डले परीक्षा सञ्चालनको तयारी अन्तिम चरणमा पुगेको भन्दै, विद्यार्थीहरूको भविष्यलाई ध्यानमा राख्दै निर्धारित मितिमा नै परीक्षा गराउने निर्णय लिएको जनाएको छ।