ताप्लेजुङ । पाथीभरा मन्दिर दर्शनका लागि फुङ्लिङबाट गइरहेको एक बलेरो गाडीमा अचानक आगलागी हुँदा चार जनाको ज्यान गएको छ भने दुई जना घाइते भएका छन्।
जिल्ला प्रहरी कार्यालय ताप्लेजुङका अनुसार फुङ्लिङ नगरपालिका–१० सेवारोचोकमा मे १च ३०११ नम्बरको बलेरो गाडीमा एक्कासि आगो लागेको हो। प्रहरीका सूचना अधिकारी विवेक बस्नेतले दिएको जानकारी अनुसार आगलागीमा परी ज्यान गुमाउनेमा ललितपुर–१० की १६ वर्षीया आध्या आचार्य, भद्रपुर–१५ का ७० वर्षीय विनोद पौडेल, उनकी ६९ वर्षीया श्रीमती सरिता पौडेल तथा गाडी चालक फुङ्लिङ–१० का ४२ वर्षीय दुर्गा भट्टराई छन्।
घाइते हुनेमा ललितपुर–१० की ४५ वर्षीया सविना आचार्य र उनका १० वर्षीय छोरा भविमय आचार्य रहेका छन्। उनीहरूको अहिले जिल्ला अस्पतालमा उपचार भइरहेको छ। प्रारम्भिक अनुसन्धानअनुसार सडकमा खसेको विद्युत् तारमा गाडी अल्झिँदा आगो लागेको हो। बिहान करिब ५ बजे घटना भएको जनाइएको छ।
खबर पाउनासाथ प्रहरी निरीक्षक रवि रावलको नेतृत्वमा १५ जना प्रहरी टोली घटनास्थल पुगेको थियो।
प्रतिक्रिया