काठमाडौं । सञ्चार तथा सूचना प्रविधि मन्त्री पृथ्वीसुब्बा गुरुङले सामाजिक सञ्जाल प्ल्याटफर्महरूलाई सरकारले तोकेको समयसीमाभित्र दर्ता हुन आग्रह गर्दै त्यसअनुसारको पालना नभए प्रतिबन्धको सामना गर्नुपर्ने चेतावनी दिएका छन्।
शुक्रबार राजधानीमा सञ्चारिका समूह नेपालको नवौँ महाधिवेशनमा बोल्दै मन्त्री गुरुङले नेपालमा सञ्चालन भइरहेका फेसबुक लगायतका सबै सामाजिक सञ्जालले मुलुकको कानुनको पालना गर्नुपर्ने बताएका हुन्। सरकारले चैत ७ गते सूचना प्रकाशित गर्दै एक महिनाभित्र दर्ता हुन सामाजिक सञ्जालहरूलाई आह्वान गरेको थियो।
पछि थप गरिएको समयसीमा पनि सकिनै लाग्दा अधिकांशले अझैसम्म दर्ता प्रक्रिया पूरा नगरेको मन्त्री गुरुङको भनाइ थियो। उनले स्पष्ट पारेअनुसार सामाजिक सञ्जाल नियमनका लागि ल्याइएको कानुनी व्यवस्था कुनै प्लेटफर्म बन्द गर्ने उद्देश्यले नभइ जिम्मेवार र उत्तरदायी बनाउने हेतुले गरिएको हो।
मन्त्री गुरुङका अनुसार, यदि सामाजिक सञ्जालहरूले सरकारको निर्देशनको पालना नगरे समयमै आवश्यक कदम चालिनेछ, जसमा प्रतिबन्ध पनि हुन सक्नेछ।
प्रतिक्रिया