काठमाडौँ । थुनामा रहेका चार भुटानी नागरिकलाई तत्काल देश निकाला नगर्न सर्वोच्च अदालतले सरकारलाई अन्तरिम आदेश दिएको छ। अमेरिका डिपोर्ट भई भुटान हुँदै नेपाल प्रवेश गरेका ती व्यक्तिहरू अहिले झापामा थुनामा छन्।
न्यायाधीश हरिप्रसाद फुयाँलको इजलासले अशोक गुरुङ, सन्तोष दर्जी, रोशन तामाङ र आशिष सुवेदीलाई वैशाख ११ गते अदालतमा उपस्थित गराउन आदेश दिएको छ। उनीहरूलाई जबरजस्ती देश निकाला गर्न नपाइने भन्दै हाललाई कारबाही प्रक्रिया रोकिएको हो।
मानवअधिकार र अन्तर्राष्ट्रिय शरणार्थी मापदण्डको उल्लंघन हुने भन्दै नारायणकुमार सुवेदीसहित चार जनाले बन्दी प्रत्यक्षीकरणको रिट दायर गरेका थिए। प्रारम्भिक सुनुवाइपछि सर्वोच्चले उक्त आदेश दिएको हो।
यो निर्णयले शरणार्थी व्यवस्थापनमा कानूनी प्रक्रिया र मानवीय पक्षको ख्याल राख्न आवश्यक रहेको सन्देश दिएको छ।
प्रतिक्रिया