काठमाडौं । चर्चित ललिता निवास जग्गा प्रकरणमा संलग्न भएको आरोप लागेका पूर्वप्रधानमन्त्री माधवकुमार नेपाल र डा. बाबुराम भट्टराईविरुद्ध दायर रिटमा आज सर्वोच्च अदालतमा सुनुवाइ हुँदैछ।
वरिष्ठ अधिवक्ता बालकृष्ण नेउपानेसहितको कानुनी टोलीले दायर गरेको रिटमा प्रधानन्यायाधीश प्रकाशमान सिंह राउत, न्यायाधीश टेकप्रसाद ढुंगाना र नित्यानन्द पाण्डे रहेको पूर्ण इजलासमा सुनुवाइ तय भएको हो।
रिटमा पूर्वप्रधानमन्त्रीहरू नेपाल र भट्टराईसहित, पूर्वमुख्यसचिव लिलामणि पौड्याल, प्रधानमन्त्री तथा मन्त्रिपरिषद् कार्यालय, महान्यायाधिवक्ताको कार्यालय र नेपाल प्रहरीको केन्द्रीय अनुसन्धान ब्यूरोलाई विपक्षी बनाइएको छ।
२०७६ मा सार्वजनिक भएको यस प्रकरण अनुसार, २०६६/६७ मा प्रधानमन्त्री रहेका माधवकुमार नेपालले मन्त्रिपरिषद्बाट ललिता निवासको जग्गा भूमाफिया र नक्कली मोहीलाई सट्टाभर्ना दिने निर्णय गरेका थिए। त्यसैगरी, २०६९ मा प्रधानमन्त्री हुँदा डा. भट्टराईले ललिता निवासको करिब साढे ३ रोपनी जग्गा पशुपति टिकिन्छा गुठीको नाममा कायम गराउने निर्णय गरेका थिए।
त्यसक्रममा तत्कालीन मुख्यसचिव लिलामणि पौड्यालले नक्कली मोही खडा गर्न भूमिका खेलेको आरोपसहित उनीविरुद्ध पनि कारबाहीको माग गरिएको छ।
सुनुवाइपछि अदालतको निर्णयले यस प्रकरणले नयाँ मोड लिने अनुमान गरिएको छ।
प्रतिक्रिया