काठमाडौं । त्रिभुवन अन्तर्राष्ट्रिय विमानस्थलमा युएईबाट नेपाल फर्किएका एक यात्रुसँग दुर्व्यवहार गरेको आरोपमा विमानस्थलमा कार्यरत तीन जना प्रहरीलाई जिम्मेवारीबाट हटाइएको छ।
उक्त घटना सामाजिक सञ्जालमा सार्वजनिक भएपछि छानबिन सुरु भएको हो। मोरङका सञ्जय ओझा नाम गरेका व्यक्तिमाथि दुर्व्यवहार भएको भिडियो भाइरल बनेपछि प्रहरी प्रशासनले तत्काल प्रतिक्रिया जनाएको छ।
काठमाडौं उपत्यका प्रहरी कार्यालयका एसएसपी शेखर खनालका अनुसार ती तीन जना प्रहरीलाई विमानस्थलको जिम्मेवारीबाट हटाएर अनुसन्धानका लागि उपत्यका प्रहरी कार्यालयमा झिकाइएको हो।
खनालले ती प्रहरीलाई हालसम्म जिम्मेवारीबाट मुक्त गरिएको र घटनाबारे आवश्यक अनुसन्धान जारी रहेको जानकारी दिए।
यात्रुहरूप्रति संवेदनशील हुनुपर्ने ठाउँमा यस प्रकारको व्यवहार सार्वजनिक भएपछि सामाजिक सञ्जालमा व्यापक आलोचना भएको थियो। यो घटनाले विमानस्थल सुरक्षामा खटिएका सुरक्षाकर्मीहरूको व्यवहारमाथि पुनः प्रश्न उठाएको छ।
प्रतिक्रिया