काठमाडौं । हङकङमा जारी चारदेशीय टी-२० अन्तर्राष्ट्रिय क्रिकेट प्रतियोगितामा कुवेतले नेपाललाई उपाधि जित्न १७५ रनको चुनौती दिएको छ।
मङ्ककस्थित मिसन क्रिकेट ग्राउण्डमा टस हारेर पहिले ब्याटिङको निम्तो पाएको कुवेतले २० ओभरमा ७ विकेट गुमाउँदै १७४ रनको सशक्त स्कोर बनायो। कुवेतले आक्रामक सुरुवात गरेको थियो। ९ ओभरमै उसले २ विकेट गुमाउँदै १०० रन पार गरिसकेको थियो भने १० ओभरमा ११० रन बनाएको थियो।
तर तेस्रो विकेटका रूपमा उस्मान पटेल आउट भएपछि कुवेतको रनगति केही मन्द भयो र बाउन्ड्रीको सङ्ख्यामा गिरावट आयो। ओपनर रविजा सान्द्रारुवानले ६३ रनको उत्कृष्ट अर्धशतकिय पारी खेले। उनले ३६ बलमा ६ चौका र ४ छक्का प्रहार गरे। क्लिन्टो एन्टोले २६, मित भवसारले १६, र उस्मान पटेलले २३ रनको योगदान दिए।
विलाल ताहिर रन आउट भएपछि कुवेतको पारी केही दबाबमा परेको देखिएको थियो। अन्तिममा कप्तान मोहम्मद आस्लम १३ रन र नवीनराज राजेन्द्रन ८ रनमा अविजित रहे। नेपालका लागि बलिङतर्फ नन्दन यादव र सोमपाल कामीले समान २–२ विकेट लिँदा, करण केसी र कुशल भुर्तेलले १–१ विकेट लिए।
अब नेपालले उपाधि जित्न १७५ रनको विशाल लक्ष्य पछ्याउनुपर्नेछ।
प्रतिक्रिया