चार देशीय टी–२० सिरिजको फाइनलमा नेपालको टस जित, कुवेत ब्याटिङमा

काठमाडौं – हङकङमा जारी चार राष्ट्र सम्मिलित टी–२० क्रिकेट सिरिजको फाइनल खेलमा नेपालले कुवेतविरुद्ध टस जित्दै पहिला बलिङ गर्ने निर्णय गरेको छ।

नेपाली कप्तान रोहित पौडेलले टस जितेपछि विपक्षी कुवेतलाई ब्याटिङका लागि आमन्त्रण गरेका हुन्। यसअघि समूह चरणको अन्तिम खेलमा नेपाल र हङकङबीचको खेल वर्षाले प्रभावित भएपछि दुवै टोलीले एक–एक अंक बाँडेका थिए। उक्त अंक बाँडफाँटसँगै नेपाल ३ खेलमा ५ अंक जोड्दै तालिकाको शीर्ष स्थानमा रहँदै फाइनलमा प्रवेश गरेको हो।

कुवेतले भने ३ खेलमा ४ अंक जोड्दै दोस्रो स्थानबाट फाइनल यात्रा तय गरेको हो। नेपालले लिग चरणमै कुवेतलाई ६ विकेटले हराएको स्मरणीय प्रदर्शन गरेको थियो, जसले फाइनल खेलमा पनि उत्साह थपेको छ।

त्यस्तै, आजै सम्पन्न तेस्रो स्थानको खेलमा हङकङले कतारलाई रोमाञ्चक एक रनले हराउँदै तेस्रो स्थान हासिल गरेको छ।