आफ्नै सुरक्षाको लागि आत्मसमर्पण: प्रसाईँ सचिवालय

काठमाडौं । सामाजिक तथा राजनीतिक क्षेत्रका चर्चित व्यक्तित्व दुर्गा प्रसाईले भारतको आसाम राज्यको प्रहरीसमक्ष आत्मसमर्पण गरेका छन्।

प्रसाईको सचिवालयद्वारा सार्वजनिक गरिएको जानकारी अनुसार, उनले आफ्नो व्यक्तिगत सुरक्षाको लागि यस्तो निर्णय लिएका हुन्। सचिवालयद्वारा जारी विज्ञप्तिमा उल्लेख गरिएको छ, “आज बिहान करिब २ घण्टा अघि हाम्रो अभियानका संयोजक श्री दुर्गा प्रसाईले आफ्नो सुरक्षालाई मध्यनजर गर्दै भारतको आसाम राज्यको प्रहरीसमक्ष स्वेच्छिक रूपमा आत्मसमर्पण गर्नु भएको छ।”

सचिवालयले थप स्पष्ट पारेको छ कि प्रसाईले यसअघि सार्वजनिक भिडियोमार्फत यदि सुरक्षाको प्रत्याभूति गरिन्छ भने २४ घण्टाभित्र उपस्थित हुने घोषणा गरेका थिए। “हिजोमात्रै हामीले भिडियोमार्फत हाम्रो सुरक्षाको ग्यारेन्टी भए हामी २४ घण्टाभित्र उपस्थित हुनेछौं भनेका थियौं, र आज त्यो अनुसार उहाँ उपस्थित हुनुभयो,” सचिवालयले उल्लेख गरेको छ।

सन्देशको अन्त्यमा सचिवालयले “जय देश, जय राष्ट्रवाद” को नारासहित राष्ट्रप्रेमको भावना व्यक्त गरेको छ।