पूर्वी तराईमा आकस्मिक बदली: मेघ गर्जन र चट्याङसँगै पानीको झरी

काठमाडौं । देशभर प्रदूषणको चपेटामा परेको मौसमले पूर्वी तराईमा भने राहतको संकेत देखाएको छ।

बुधबार बिहानदेखि झापा, मोरङ लगायतका जिल्लाहरूमा मेघगर्जन र चट्याङसहित भीषण वर्षा भएको छ। तर काठमाडौं उपत्यकामा भने अझै पानी पर्न नसक्दा यहाँको वायु गुणस्तर विश्वकै सर्वाधिक खराब स्तरमा पुगेको छ। धुलो र प्रदूषणका कारण उपत्यकामा आँखाको जलन, टाउको दुख्ने, सास फेर्न गाह्रो हुने समस्याहरू देखिन थालेका छन्।

मौसमविद्हरूका अनुसार पूर्वी भागमा वर्षा भएसँगै ती क्षेत्रमा वायुमण्डल शुद्धिकरण प्रक्रिया सुरु भए पनि उपत्यका र पश्चिमी शहरहरू अझै प्रदूषणकै चपेटामा छन्। विशेषज्ञहरूले काठमाडौंमा पनि चाँडै वर्षा भएमा प्रदूषण कम हुने अपेक्षा गरेका छन्।