काठमाडौं । हाल देशमा पश्चिमी र स्थानीय वायुले आंशिक प्रभाव पारेको मौसम पूर्वानुमान महाशाखाले जनाएको छ।
देशका पहाडी भू-भागहरूमा आंशिक बदली रहे पनि बाँकी अधिकांश स्थानमा मौसम सामान्यतया सफा रहेको छ। गण्डकी र कर्णाली प्रदेशका केही पहाडी क्षेत्रमा मेघगर्जन, चट्याङसहित हल्का वर्षा भइसकेको छ। आइतबार कोशी र गण्डकी प्रदेशका पहाडी क्षेत्रहरूमा समेत यस्तो हल्का वर्षा हुने सम्भावना रहेको महाशाखाले जनाएको छ।
साथै, कोशी, बागमती र गण्डकी प्रदेशका उच्च पहाडी तथा हिमाली क्षेत्रहरूमा हल्का वर्षा र हिमपातको सम्भावना पनि रहेको छ। तर अधिकांश भू-भागमा वर्षाको सम्भावना न्यून रहेकोले मौसम सुख्खा रहनेछ, जसले गर्दा वायु प्रदूषण, आगलागी, र जनस्वास्थ्यमा असर पार्न सक्ने पूर्वानुमान गरिएको छ।
महाशाखाले सम्भावित जोखिमलाई ध्यानमा राखी आवश्यक सतर्कता अपनाउन सबैलाई आग्रह गरेको छ।
प्रतिक्रिया