काठमाडौंमा वायु प्रदूषण खतराको तहमा, सतर्क रहन आग्रह

काठमाडौं । काठमाडौं उपत्यकामा वायु प्रदूषण एकसाता यता अति अस्वस्थकर अवस्थामा पुगेको छ।

आइतबार बिहान ‘आईक्यू एअर’ले गरेको मापनअनुसार काठमाडौंको वायु गुणस्तर सूचकांक (एक्यूआई) २११ पुगेको छ, जुन मानकअनुसार अत्यन्त अस्वस्थकर श्रेणीमा पर्छ। विश्वका अत्यधिक प्रदूषित शहरहरूमा काठमाडौं दोस्रो स्थानमा परेको छ, जहाँ भारतको दिल्ली २९० एक्यूआईसहित पहिलो स्थानमा छ।

तेस्रो स्थानमा भने पाकिस्तानको लाहोर १९९ एक्यूआईका साथ परेको छ। पछिल्लो समय वर्षा नहुनु, डढेलोबाट फैलिएको धुवाँ र धुलोका कारण उपत्यकाको आकाशमा प्रदूषणको मात्रा झनै बढेको जनाइएको छ। विश्व स्वास्थ्य संगठन (WHO) का अनुसार ०–५० बीचको एक्यूआई मात्र स्वास्थ्यका लागि सुरक्षित मानिन्छ।

तर काठमाडौंको स्थिति निकै चिन्ताजनक बनेपछि स्वास्थ्य मन्त्रालयले सतर्कता अपनाउन नागरिकहरूलाई आग्रह गरेको छ। अनावश्यक रूपमा घर बाहिर ननिस्कन, र बाहिर निस्कनै परेमा मास्कको प्रयोग अनिवार्य गर्न सुझाव दिइएको छ।