तीनकुनेमा सार्वजनिक कार्यक्रम स्थायी रूपमा निषेध गर्न समितिको निर्देशन

काठमाडौं । संसदको राज्य व्यवस्था तथा सुशासन समितिले काठमाडौँको तीनकुने क्षेत्रलाई संवेदनशील मानी सार्वजनिक कार्यक्रमहरू स्थायी रूपमा निषेध गर्न सरकारलाई स्पष्ट निर्देशन दिएको छ।

चैत १५ गते राजावादी समूहद्वारा आयोजित कार्यक्रममा भएको तोडफोड, आगजनी र लुटपाटलगायतका घटनापछि समितिले गृहमन्त्री र सुरक्षा निकाय प्रमुखसँग छलफल गरी तीनकुने क्षेत्रको सुरक्षालाई लिएर चिन्ता व्यक्त गरेको हो। समितिका अनुसार सो क्षेत्र अन्तर्राष्ट्रिय विमानस्थल, पेट्रोलियम पदार्थको भण्डारण, प्रमुख राजमार्ग तथा सञ्चारगृह नजिकै भएकाले अझ संवेदनशील मानिन्छ।

समितिको निर्देशनमा भनिएको छ, “तीनकुने र त्यस आसपासका क्षेत्रमा कुनैपनि सभा, प्रदर्शन, धर्ना वा अन्य सार्वजनिक कार्यक्रम आयोजना गर्न अब अनुमति नदिन प्रधानमन्त्री तथा मन्त्रिपरिषदको कार्यालय र गृह मन्त्रालयलाई निर्देशन दिइन्छ।”यसअघि अस्थायी निषेधाज्ञाको आलोचना गर्दै आएका सांसदहरूले समेत तीनकुने घटनाले देखाएको संवेदनशीलतालाई ध्यान दिँदै स्थायी निषेधको माग गरेका हुन्।

समितिले घटनामा संलग्न दोषीको छानबिन गरी कानुनी कारबाही अगाडि बढाउन निर्देशन दिएको छ। साथै, हिंसात्मक गतिविधिहरू दोहोरिन नदिन तथा संघीय लोकतान्त्रिक गणतन्त्रको रक्षा गर्न सरकार गम्भीर हुनुपर्ने सुझाव पनि दिएको छ।

आगामी बजेटमा प्रहरी संगठनलाई आवश्यक स्रोत–साधन उपलब्ध गराउने व्यवस्था गर्नसमेत समितिले सरकारलाई सिफारिस गरेको छ।