ओली–मोदी भेट : नेपाल–भारत सम्बन्धलाई प्राथमिकता दिएको मोदीको भनाइ

काठमाडौं । थाइल्याण्डको बैंककमा सम्पन्न छैटौँ बिमस्टेक शिखर सम्मेलनका क्रममा भारतीय प्रधानमन्त्री नरेन्द्र मोदी र नेपाली प्रधानमन्त्री केपी शर्मा ओलीबीच द्विपक्षीय भेटवार्ता सम्पन्न भएको छ।

भेटपछि सामाजिक सञ्जालमार्फत मोदीले प्रधानमन्त्री ओलीसँगको भेटलाई ‘फलदायी’ भन्दै भारतले नेपालसँगको सम्बन्धलाई उच्च प्राथमिकतामा राखेको बताएका छन्। उनले लेखेका छन्, “बैंककमा प्रधानमन्त्री केपी शर्मा ओलीसँगको भेटघाट फलदायी रह्यो। भारतले नेपालसँगको सम्बन्धलाई ठूलो प्राथमिकता दिएको छ। हामीले ऊर्जा, कनेक्टिभिटी, संस्कृति र डिजिटल प्रविधिका क्षेत्रहरूमा विस्तृत छलफल गर्यौं। साथै, बिमस्टेक सम्मेलनबाट प्राप्त सकारात्मक नतिजा—विशेषगरी विपद् व्यवस्थापन र समुद्री यातायातका क्षेत्रमा पनि विचारविमर्श गर्यौं।”

यो भेटवार्ता प्रधानमन्त्री ओलीको हालको कार्यकालमा भारतीय समकक्षीसँगको दोस्रो औपचारिक संवाद हो। यसअघि संयुक्त राष्ट्रसंघको महासभाको क्रममा अमेरिकामा दुई नेताबीच साइडलाइन बैठक भएको थियो।