ओली र मोदीबीच ४५ मिनेटको भेट, ‘सकारात्मक संवाद’ भएको ओलीको दाबी

काठमाडौं । प्रधानमन्त्री केपी शर्मा ओलीले भारतीय समकक्षी नरेन्द्र मोदीसँगको भेटलाई सकारात्मक र फलदायी भएको बताएका छन्।

थाइल्याण्डको बैंककस्थित होटल माडारिन ओरियन्टलमा बिहीबार दुई प्रधानमन्त्रीबीच करिब ४५ मिनेट एक्लाएक्लै वार्ता भएको थियो। भेटपछि सञ्चारकर्मीसँग संक्षिप्त कुरा गर्दै प्रधानमन्त्री ओलीले भने, “मोदीजीसँगको संवाद राम्रो र सकारात्मक भयो, अहिलेलाई यत्ति मात्रै भन्न चाहन्छु।” उनीहरूबीचको यो भेट बिम्स्टेकको छैटौँ शिखर सम्मेलनको समापनपछि पूर्वनिर्धारित तालिकाअनुसार सम्पन्न भएको हो।

यसअघि ओली र मोदीबीच संयुक्त राष्ट्रसंघको ७९औँ महासभामा सहभागी हुन गएको बेला असोज ७ गते अमेरिकाको न्युयोर्कमा भेटवार्ता भएको थियो।

प्रधानमन्त्री ओली र मोदीबीचको पछिल्लो भेटलाई क्षेत्रीय सहकार्य र द्विपक्षीय सम्बन्ध मजबुत पार्ने अवसरका रूपमा हेरिएको छ।