कुलमान र हितेन्द्रदेवको रिटमाथि सुनुवाइ सम्पन्न, आदेश आजै आउने

काठमाडौं । नेपाल विद्युत् प्राधिकरणको कार्यकारी निर्देशक नियुक्तिसम्बन्धी विवादमा सर्वोच्च अदालतमा बिहीबारसम्म बहस सकिएको छ।

कुलमान घिसिङ र हितेन्द्रदेव शाक्यले दायर गरेको रिटमाथि न्यायाधीशद्वय कुमार चुडाल र नित्यानन्द पाण्डेयको इजलासमा मंगलबारदेखि सुनुवाइ भइरहेको थियो। पहिलो दिन कुलमानका कानुन व्यवसायीले बहस गरेका थिए भने बुधबार हितेन्द्रदेवका कानुन व्यवसायी र महान्यायाधिवक्ता रमेश बडालले सरकारी पक्षबाट पक्ष राखेका थिए।

बिहीबार तेस्रो दिनको बहसमा हितेन्द्रदेव र सरकारी वकिलले आफ्नो तर्क प्रस्तुत गरेपछि कुलमान पक्षका कानुन व्यवसायीहरूले जवाफी बहस गरेका थिए। बहस सम्पन्न भइसकेको छ भने अहिले आदेश लेखनको काम भइरहेको छ।

आदेश आजै सार्वजनिक हुने सम्भावना रहेको छ।