काठमाडौं । तीनकुनेमा राजावादी समूहद्वारा आयोजित प्रदर्शनका क्रममा आगलागीमा परी ज्यान गुमाएका पत्रकार सुरेश रजकको शरीरमा गोली लागेको कुनै निशान नभेटिएको छ।
मंगलबार साँझ गरिएको एक्सरे परीक्षणपछि यस्तो पुष्टि भएको हो, जसका आधारमा शवको पोस्टमार्टम प्रक्रिया अघि बढाइएको छ। रजक एभिन्युज टेलिभिजनका पत्रकार थिए। गत १५ चैतमा तीनकुनेस्थित एक निजी घरमा प्रदर्शनसम्बन्धी भिडियो खिच्ने क्रममा उनी आगलागीमा फसेका थिए। हाल उनको शव महाराजगन्जस्थित शिक्षण अस्पतालमा राखिएको छ।
रजकका परिवारजनले घटनाको स्वतन्त्र छानबिन हुनुपर्ने, उनलाई सहिद घोषणा गर्नुपर्ने, तथा उचित क्षतिपूर्तिको माग गरेका छन्। यसैबीच, तीनकुने घटनामा ज्यान गुमाएका अर्का व्यक्ति, कीर्तिपुरका सविन महर्जनको मंगलबार साँझ पशुपतिनाथ आर्यघाटमा अन्त्येष्टि गरिएको छ।
प्रतिक्रिया