काठमाडौं । निर्देशक कृषा चौलागाईंको मल्टिस्टारर–एक्सन फिल्म ‘पिताम्बर’को ट्रेलर युट्युबमा सार्वजनिक गरिएको छ।
मंगलबार आयोजित पत्रकार सम्मेलनमा यो ट्रेलर मिडियासम्म पुर्याइएको हो। ट्रेलरको ३ मिनेट १४ सेकेण्डको रनटाइमले चलचित्रको कथावस्तु र चरित्रहरूको प्रभावकारी चित्रण गरेको छ। फिल्मको विषय महिलामाथिको अन्याय र शोषणको विरोधमा लड्ने शीर्ष पात्र पिताम्बरुको संघर्षलाई आधार बनाएको छ।
यस फिल्मले महिला न्याय र अत्याचारका विरुद्धको लडाइँलाई एक्सन, ड्रामा, रोमान्स र संवेदनाका साथ प्रस्तुत गरेको छ। ट्रेलरमा प्रदीप खड्का, सौगात मल्ल, प्रमोद अग्रहरि, र दिब्यदेवका एक्सन अवतारहरू आकर्षक देखिन्छन्। ट्रेलरले प्रदीप खड्काको वरिपरि आधारित कथालाई प्रस्तुत गर्दै दिब्या रायमाझीलाई उनको लभ इन्ट्रेस्टको रूपमा देखाएको छ।
एक्सन कोरियोग्राफी र भव्य प्रोडक्सन डिजाइनले यो ट्रेलरलाई थप आकर्षक बनाएको छ। चलचित्रमा आर्यन सिग्देल, अनुपविक्रम शाही, सुरक्षा पन्त, गौरी मल्ल, रवीन्द्र झा, कामेश्वर चौरासिया जस्ता शीर्ष कलाकारहरूको महत्वपूर्ण भूमिकामा अभिनय छ।
विशाल चौलागाईं द्वारा निर्मित यो फिल्म चैत २९ गते प्रदर्शनको तयारीमा छ।
प्रतिक्रिया