काठमाडौं । प्रधानमन्त्री केपी शर्मा ओली आज मित्रराष्ट्र थाइल्याण्डको औपचारिक भ्रमण तथा बिमस्टेक शिखर सम्मेलनमा भाग लिन त्यसतर्फ प्रस्थान गर्दैछन्।
उनी दिउँसो १ बजे थाइल्याण्डको राजधानी बैंकक प्रस्थान गर्ने कार्यक्रम छ। प्रतिनिधिसभामा हिजोको सम्बोधनका क्रममा प्रधानमन्त्री ओलीले नेपाल–थाइल्याण्ड कूटनीतिक सम्बन्ध स्थापना भएको ६५ वर्षपछि पहिलो पटक कुनै नेपाली प्रधानमन्त्रीले औपचारिक भ्रमण गर्न लागेको उल्लेख गरे।
बैंककलाई दक्षिणपूर्वी एसियामा ‘गेटवे’ मानिने भएकाले यो भ्रमण विशेष महत्त्वको भएको उनले बताए। यस भ्रमणका क्रममा प्रधानमन्त्री ओलीले थाइल्याण्डका नरेश तथा समकक्षीसँग भेटवार्ता गर्नेछन्। पर्यटन र संस्कृतिसम्बन्धी दुई महत्वपूर्ण समझदारीपत्रमा हस्ताक्षर हुनेछ भने गैरसरकारी क्षेत्रबीच ६ सम्झौताहरू सम्पन्न हुनेछन्।
साथै, उनले थाइल्याण्डका प्रतिष्ठित व्यवसायीहरूसँग छलफल गर्नुका साथै एशियन इन्स्टिच्युट अफ टेक्नोलोजीमा सम्बोधन गर्ने कार्यक्रम रहेको छ। प्रधानमन्त्री ओलीले चैत २२ गते बिमस्टेक शिखर सम्मेलनलाई सम्बोधन गर्नेछन्।
साथै, अन्य मुलुकका नेताहरूसँग साइडलाइन वार्ताको सम्भावना रहेको जनाइएको छ।
प्रतिक्रिया