गुल्मी । तीन महिनापछि गुल्मीको रेसुङ्गा विमानस्थलबाट पुनः उडान सुरु भएको छ।
गत पुस ४ गतेदेखि अवरुद्ध भएको हवाई सेवा सोमबारदेखि पुनः सञ्चालन गरिएको हो । सोमबारको पहिलो उडानमा काठमाडौंबाट रेसुङ्गाका लागि १४ जना यात्रु आएका थिए भने रेसुङ्गाबाट काठमाडौं फर्किने यात्रु सङ्ख्या ४ मात्र रहेको थियो। नेपाल एयरलाइन्सको विमान मर्मतको कारण लामो समयसम्म उडान रोकिएको थियो।
सुरुवातमा सातामा एक दिन (शुक्रबार) मात्रै उडान भर्ने गरिए पनि यात्रुको चाप बढेपछि साप्ताहिक तीन उडानको अनुमति दिइएको थियो। तर, वर्षायाम सुरु भएसँगै पुनः सातामा एक दिनमात्र (शुक्रबार) उडान हुने व्यवस्था गरिएको थियो। अहिले यात्रुको मागलाई ध्यानमा राखी (शुक्रबार र बुधबार) गरी हप्तामा दुई दिन उडान भर्ने निर्णय गरिएको छ।
हाल गुल्मीबाट काठमाडौंका लागि टिकट दर ७,३०० रुपैयाँ तोकिएको छ भने काठमाडौंबाट गुल्मीका लागि ७,५०० रुपैयाँ निर्धारण गरिएको छ।
प्रतिक्रिया