काठमाडौं । राष्ट्रिय प्रजातन्त्र पार्टीका प्रवक्ता ज्ञानेन्द्रबहादुर शाहीले नेपाल विद्युत् प्राधिकरणबाट कुलमान घिसिङलाई हटाउने उर्जामन्त्री दीपक खड्कालाई सरकारबाट फिर्ता बोलाउन नेपाली कांग्रेसलाई खुल्ला चुनौती दिएका छन्।
कांग्रेसका महामन्त्री गगन थापा र विश्वप्रकाश शर्मामाथि कटाक्ष गर्दै शाहीले भने, “गोहीको जस्तो आँसु नझार्नुस्।” उनले थपे, “आफै झाँक्री, आफै बोक्सी। गगन थापा र विश्वप्रकाश शर्माजी यदि तपाईंहरूले साँच्चै कुलमान घिसिङलाई पुनर्नियुक्ति गर्न चाहनुहुन्छ भने, कुलमान घिसिङलाई हटाउने मन्त्रीलाई फिर्ता बोलाउनुस् र कारबाही गर्नुहोस्। चाबी र ताला तपाईंकै हातमा छ।”
शाहीले नेकपा माओवादी केन्द्रका अध्यक्ष प्रचण्डलाई समेत चुनौती दिँदै भने, “यदि तपाईं साँच्चै कुलमान घिसिङलाई पुनर्नियुक्ति गर्न चाहनुहुन्छ भने, कांग्रेस र एमालेसँगको गोप्य सम्झौतामा भएको टिआरसी विधेयकको सहमति तोड्नुहोस्। अन्यथा, हातिको जस्तो दुईवटा दाँत नदेखाउनुहोस्, एउटा चपाउने र अर्को लुकाउने। गोहीको जस्तो आँसु नझार्नुस् र सामाजिक सञ्जालमा मात्र रमिता र नाटक नगर्नुस्।”
ज्ञानेन्द्र शाहीको यो वक्तव्यले राजनीतिक माहोलमा ताजातरीन बहस सिर्जना गरेको छ।
प्रतिक्रिया