काठमाडौँ । प्रहरीको विशेष टोलीले ठूलो परिमाणमा विदेशी मुद्रासहित एक व्यक्तिलाई पक्राउ गरेको छ।
सिन्धुपाल्चोकको भोटेकोशी गाउँपालिका– १ का ४३ वर्षीय कुसान लामा ‘फुच्चे’ भनिने कुसाङ लामा पक्राउ परेका छन् । उनलाई टोखा नगरपालिका–१ स्थित झोर क्षेत्रबाट सोमबार राति पक्राउ गरिएको हो । प्रहरीले गोप्य सूचनाको आधारमा ना ७ ख १६७२ नम्बरको ट्रकलाई नियन्त्रणमा लिई, ट्रकमा लुकाइ छिपाइ राखिएका अमेरिकी डलर र यूरो बरामद गरेको छ।
काठमाडौँ उपत्यका अपराध अनुसन्धान कार्यालयका प्रमुख एसएसपी रमेश बस्नेतका अनुसार, लामा सँग २५ करोड १ लाख ६ हजार ३३८ रुपैयाँ बराबरको विदेशी मुद्रा बरामद गरिएको जानकारी दिएका छन्। ट्रकमा फल्स बटम बनाएर रकम लुकाइ राखिएको थियो। प्रारम्भिक अनुसन्धानले लामा चालक र भरियाका रूपमा काम गर्दै आएको खुलासा गरेको छ। तर, उनले बरामद गरिएको रकमको मालिकको बारेमा कुनै जानकारी दिएका छैनन्।
अघिल्लो समय लामा सुन तस्करी प्रकरणमा पनि पक्राउ परिसकेका थिए र उनले सात किलो सुन तस्करी गरेको अभियोगमा कारावास भोगेका थिए। यस पटक उनलाई राजश्व विभाग हरिहर भवन पठाइएको छ र थप अनुसन्धान जारी रहेको एसएसपी बस्नेतले बताएका छन्।
प्रतिक्रिया