काठमाडौं । भारतविरुद्धको चौथो टेस्टमा शानदार जित निकाल्दै अस्ट्रेलिया टेस्ट च्याम्पियनसीपको फाइनलमा स्थान बनाउने सम्भावना बलियो बनाएको छ ।
अस्ट्रेलियाले दिएको ३ सय ४० रनको लक्ष्य पछ्याएको भारत अन्तिम दिनको अन्तिम सेसनमा १ सय ५५ रनमा अलआउट भयो । भारतका लागि यशश्वी जैसवालले सर्वाधिक ८२ रनको योगदान दिएपनि जितका लागि पर्याप्त भएन् । अस्ट्रेलियाका कप्तान प्याट कमिन्स र स्कट बोलान्डले ३/३ विकेट लिए भने नेथन लायनले २ तथा मिचेल स्टार्क र ट्राभिस हेडले १/१ विकेट हात पारे । अन्तिम दिनको पहिलो सेसनबाटै लक्ष्य पछ्याउन थालेको भारतले सबै विकेट गुमाएको हो ।
त्यसअघि पहिलो सेसनमा अस्ट्रेलियाले ४ सय ७४ रन बनाएर अलआउट भएको थियो भने जवाफमा भारतले नितिश कुमार रेड्डीको शतक मद्दतमा ३ सय ६९ रन बनाएको थियो । त्यसपछि अस्ट्रेलियाले १ सय ५ रनको अग्रताबाट खेल्न सुरू गरी थप २ सय ३४ रन जोडेर कुल ३ सय ३९ रनको अग्रतासहित भारतलाई ३ सय ४० रनको बलियो लक्ष्य प्रस्तुत गरेको छ ।
पहिलो टेस्टमा भारत विजयी हुँदा दोस्रो टेस्ट अस्ट्रेलियाले जितेको थियो भने तेस्रो टेस्ट ड्र भएको थियो । अब अन्तिम टेस्ट जनवरी ३ देखि हुनेछ । टेस्ट च्याम्पियनसीपको फाइनलमा दक्षिण अफ्रिका छनोट भइसकेको छ । अब भारतको सम्भावना कम भएको छ ।
भारतले अब एक खेल मात्र खेल्न बाँकी छ भने अस्ट्रेलियाले भारतसँग एक खेल र श्रीलंकासँग दुई खेल खेल्न बाँकी छ ।
प्रतिक्रिया