काठमाडौं । नेपाल प्रिमियर लिग (एनपीएल) अन्तर्गत उपाधिका लागि आज (शनिबार) सुदूरपश्चिम रोयल्स र जनकपुर बोल्ट्स भिड्दैछन् ।
खेल त्रिवि क्रिकेट मैदानमा दिउँसो १२ बजेर ३० मिनेटमा सुरु हुनेछ । उपाधि भिडन्तअगाडि सुदूरपश्चिम र जनकपुरबीच दुईपटक प्रतिस्पर्धा भएको थियो। दुवै खेलको नतिजा सुदूरपश्चिमको पक्षमा रह्यो। सुदूरपश्चिमले जनकपुरलाई लिगमा ७३ रन र पहिलो क्वालिफायरमा ८ विकेटको फराकिलो अन्तरले हराएको थियो। तेस्रोपल्ट यी दुई टोली शनिवार आमनेसामने हुँदै छन्।
सुदूरपश्चिमका कप्तान दीपेन्द्रसिंह ऐरीले यसअघिका नतिजा हेरेर नखेल्ने र सजिलो प्रतिद्वन्द्वीका रूपमा नलिने स्पष्ट पारे। साथै उनले जनकपुर पनि बलियो रहेको र राम्रो योजना बनाएर खेल्ने बताए। जनकपुरका कप्तान आसिफ शेखले फाइनलमा बदला लिनेभन्दा पनि आफूसँग भएको उत्कृष्ट प्रदर्शन दिने विश्वास व्यक्त गरे।
उनले पछिल्ला खेलमा राम्रो ब्याटिङ गर्न नसके पनि फाइनलमा राम्रो खेल्ने आशा व्यक्त गरे। पहिलो संस्करणको एनपिएल विजेताले आकर्षक ट्रफी सहित नगद रु १ करोड १० लाख पाउँने छन् । पराजित भएर उपविजेतामा सिमित रहने टोलीले नगद रु ५१ लाख प्राप्त गर्नेछ ।
तेस्रो भएको कर्णाली याक्सले नगद रु २५ लाख तथा चौथो भएको चितवन राइनोजले नगद रु १५ लाख प्राप्त गर्नेछन् ।
प्रतिक्रिया