काठमाडौं । अष्ट्रेलियाविरुद्धको दोस्रो टेस्टमा भारतले १० विकेटले पराजित भएको छ ।
अष्ट्रेलियाले चौथो इनिङमा जितका लागि पाएको १९ रनको झिनो लक्ष्य बिनाविकेट क्षति ३ दशमलव २ ओभरमा पुरा गरेको थियो । एडिलेडमा भएको टेस्टका दुवै इनिङमा भारतको ब्याटिङ चल्न सकेन । टस जितेर ब्याटिङ रोजेको भारत पहिलो इनिङमा १ सय ८० रनमा अलआउट भएको थियो ।
अष्ट्रेलियाका मिचेल स्टार्क एक्लैले ५ विकेट लिएपछि भारतको ब्याटिङ धराशायी बनेको हो । जवाफी ब्याटिङमा अष्ट्रेलियाले ३ सय ३७ रन बनाउँदै विशाल अग्रता लिन सफल भयो । अष्ट्रेलियाका मध्य क्रमका ब्याट्सम्यान ट्राभिस हेडले भारतीय बलरहरूको उछितो काढ्दै शानदार शतकीय पारी खेलेका थिए ।
उनले १ सय ४१ बलमा १ सय ४० रन बनाएपछि भारतले कमब्याकको मौका पाएन । दोस्रो इनिङमा पनि भारतीय ब्याट्सम्यानले कुनै चमत्कार देखाउन सकेनन् । १ सय ७५ रनमा भारत अलआउट भएपछि अष्ट्रेलियाले १९ रनको झिनो लक्ष्य पाएको हो । जुन लक्ष्य अष्ट्रेलियाले सहजै भेट्न सफल भयो ।
यस नतिजासँगै पाँच टेस्टको सिरिज १–१ को बराबरीमा पुगेको छ ।
प्रतिक्रिया