काठमाडौं । नेपाल प्रिमियर लिग (एनपीएल) क्रिकेटमा कर्णाली याक्सले जनकपुर बोल्ट्ससामु १ सय ४२ रनको लक्ष्य प्रस्तुत गरेको छ ।
त्रिवि क्रिकेट मैदानमा टस जितेर पहिला ब्याटिङ गरेको कर्णालीले निर्धारित ओभरमा ७ विकेट गुमाएर १ सय ४१ रन बनाएको हो । ओपनिङ राम्रो नभएपनि मध्यक्रमका ब्याट्सम्यानले इनिङ्स सम्हालेपछि कर्णाली सम्मानजनक योगफल तयार पार्न सफल भएको हो ।
दोस्रो ओभरमा नै ओपनर देव खनाललाई एक रनमा गुमाएको कर्णालीका चर्चित ब्याट्सम्यान शिखर धवन पनि १४ रनमा आउट भए । मात्र १४ बलको सामना गरेका उनी हर्स ठाकरको बलमा बोल्ड भए । खनाललाई भने ललित राजवंशीले आउट गरे । अर्का विदेशी खेलाडी चाड्वीक वाल्टन ८ र जिशान मक्सुद शुन्य रनमा पवेलियन फर्के ।
बाबर हायात पनि १२ रनमा क्याच आउट भए । बाबरले गुल्शन झासँग मिलेर पाँचौ विकेटका लागि ३३ रनको साझेदारी गर्दै आशा जनाएका थिए । गुल्शन ३६ रनमा किशोर महतोको बलमा बोल्ड भए । अर्जुन घर्ती ३३ रनमा आउट भए । अर्जुनले १९औं ओभरमा हर्स ठाकरविरुद्ध २२ रन जोडे ।
२२ बलको सामना गरेका उनले २ छक्का र २ चौका प्रहार गरे । क्याप्टेन सोमपाल कामी २९ रनमा नटआउट रहे ।
प्रतिक्रिया