विराटनगर किङ्ग्सबाट एनपीएल खेल्न नेपाल आइपुगे मार्टिन गप्टिल

काठमाडौं । नेपाल प्रिमियर लिग (एनपीएल) क्रिकेटको फ्रेञ्चाइज टोली विराटनगर किङ्ग्सबाट खेल्न न्युजिल्यान्डका मार्टिन गप्टिल नेपाल आइपुगेका छन् ।

बिहीबार नेपाल ओर्लिएका गप्टिललाई त्रिभुवन अन्तर्राष्ट्रिय विमानस्थलमा विराटनगर किङ्ग्सका प्रतिनिधिले स्वागत गरेका थिए । ३८ वर्षीय ओपनिङ ब्याटर गप्टिलले १ सय २२ टी–२० अन्तर्राष्ट्रिय क्रिकेटमा दुई शतकसहित तीन हजार पाँच सय ३१ रन बनाएका छन् । यसअघि आजै दिउँसो क्यानडाका निकोलस किर्तोन विराटनगरबाट खेल्न नेपाल आइपुगेका छन् ।

आगामी मंसिर १५ गते शनिबारदेखि शुरु हुने पहिलो संस्करणको एनपीएल प्रतियोगिताको लागि विदेशी खेलाडी धमाधम नेपाल आउने क्रम सुरु भएको छ । उद्घाटन खेलमा पर्सि दिउँसो १२ बजे विराटनगर किङ्ग्स र जनकपुर बोल्ट्स खेल्दैछन् ।

एनपीएलमा विराटनगर, जनकपुरसहित चितवन राइनोज, काठमाण्डौ गुर्खाज, पोखरा एभेन्जर्स, लुम्बिनी लायन्स, कर्णाली याक्स र सुदूरपश्चिम रोयल्स गरी आठ वटा टोली सहभागी छन् ।