यू-१९ एसिया कप खेल्न जाने नेपाली टोलीको बिदाइ

काठमाडौं । आगामी २९ नोभेम्बरबाट मलेसियामा सुरु हुने एसिसी यू-१९ एसिया कप खेल्न जाने नेपाली टोलीको बिदाई गरिएको छ ।

राष्ट्रिय खेलकुद परिषद्का सदस्य सचिव टंकलाल घिसिङ, क्यानका सचिव पारस खड्का लगायतको उपस्थितीमा मंगलबार टोलीको विदाई गरिएको हो । विदाई कार्यक्रममा बोल्दै यू-१९ टोलीका कप्तान हेमन्त धामिले १५ दिनको क्याम्प र कर्नाटकसँगको सिरिजले एसिया कपका लागि धेरै फाइदा पुगेको बताएका छन् ।

यस्तै यू-१९ टोलीका नवनियुक्त प्रशिक्षक शक्ति गौचनले टोली एसिया कपका लागि तयार रहेको बताउँदै उत्कृष्ट नतिजा ल्याउनेमा विश्वास व्यक्त गरेका छन् । कार्यक्रममा नेपाल क्रिकेट संघ (क्यान) का सचिव पारस खड्काले नेपाली युवा टोलीलाई दबाबरहित तरिकाले खेल्न सुझाव दिएका छन् ।

यस्तै, राष्ट्रिय खेलकुद परिषदका सदस्यसचिव टंकलाल घिसिङले नेपाली यू–१९ टोली नेपाली क्रिकेटको मेरुदण्ड भएको उल्लेख गरेका छन् । यू १९ एसिया कपका लागि नेपाल क्रिकेट संघ क्यानले यसअघि नै तीव्र गतिका बलर हेमन्त धामीको कप्तानीमा १५ सदस्यीय टोली घोषणा गरेको थियो ।

टोलीमा कप्तान हेमन्त धामीसँगै अर्जुन कुमाल, आकाश त्रिपाठी, उत्तम रंगु थापामगर, मयन यादव, नरेन साउद, युनिसविक्रम सिंह ठकुरी, नरेन भट्ट, सन्तोष यादव, युवराज खत्री, रोशन विश्वकर्मा, विपिनकुमार महतो, अभिषेक तिवारी र रन्जित कुमार लगायतका खेलाडीहरु रहेका छन् ।

एसिया कपमा नेपालले श्रीलंका, बंगलादेश र अफगानिस्तानसँग खेल्ने छ ।