एजेन्सी । यूईएफए नेसन्स लिगमा पोल्यान्डमाथि फराकिलो जित निकाल्दै पोर्चुगल क्वाटरफाइनलमा पुगेको छ ।
शुक्रबार राति भएको खेलमा पोर्चुगलले पोल्यान्डलाई ५-१ गोल अन्तरले पराजित गर्दै क्वाटरफाइनलमा पुगेको हो । पोर्चुगलको जितमा क्रिस्टियानो रोनाल्डोले दुई गोल गरे । त्यसैगरी राफाया लिओ, ब्रुनो फर्नान्डेस र पेड्रो नेटोले एकरएक गोल गरे । पोल्याण्डका डोमिनिक मार्क्जुकले सान्त्वना गोल फर्काए ।
दोस्रो हाफको ५९औं मिनेटमा लिओले गोल गर्दै टोलीलाई अग्रता दिलाएका थिए । त्यसपछि ७२औं मिनेटमा पोर्चुगलले पेनाल्टी पायो । पेनाल्टीमा रोनाल्डो चुकेनन् र टोलीको अग्रता दोब्बर पारे । त्यसपछि ब्रुनो फर्नान्डेसले उत्कृष्ट गोल गर्दै टोलीलाई ३-० ले अगाडि ल्याए । ८३औं मिनेटमा पेड्रोले गोल थपे भने ८७औं मिनेटमा रोनाल्डोले एक्रोब्याटिक गोल गर्दा पोर्चुगल ५-० को फराकिलो अग्रता बनाउन सफल भयो ।
त्यसको एक मिनेटपछि मार्क्जुकले सान्त्वना गोल फर्काएका थिए । ५-१ को फराकिलो जित निकालेको पोर्चुगल लिग ए ग्रुप १ मा ५ खेलमा १३ अंकसहित शीर्ष स्थानमा छ । उसको क्वाटरफाइनलमा स्थान सुरक्षित भइसकेको छ ।
प्रतिक्रिया