पहिलो अभ्यास खेलमा नेपालको यू-१९ टोली कर्नाटकसँग पराजित

काठमाडौं । यू-१९ नेपाली राष्ट्रिय क्रिकेट टोली भारतको कर्नाटक यू-१९ टोलीसँगको पहिलो अभ्यास खेलमा पराजित भएको छ ।

पाँच खेलको सिरिजअन्तर्गत पहिलो खेलमा नेपाल १ विकेटले पराजित भएको हो । नेपालले दिएको १ सय १४ रनको लक्ष्य कर्नाटकले ३२औं ओभरमा ९ विकेटको क्षतिमा पूरा गर्‍यो । कर्नाटकका लागि रोहित आरभीले सर्वाधिक ३३ रन बनाए । प्रज्वल गोवदाले २८ र रिसव अपाचुले १९ रन बनाए ।

बलिङमा नेपालका हेमन्त धामी र सन्तोष यादवले ३-३ विकेट लिए । यस्तै युनिस ठकुरीले २ तथा विपिन महतोले १ विकेट लिए ।

त्यसअघि टस हारेर पहिले ब्याटिङको निम्तो पाएको नेपाल २७ दशमलव २ ओभरमा ओभरमा १ सय १३ रनमा अलआउट भयो ।