विश्वकप लिग-२ः अमेरिकामाथि स्कटल्याण्डको सहज जित

एजेन्सी । अमेरिकामा जारी विश्वकप लिग २ अन्तर्गत गएराति भएको खेलमा स्कटल्याण्डले अमेरिकालाई पराजित गरेको छ ।

जारी त्रिकोणात्मक सिरिजको खेलमा स्कटल्याण्डले अमेरिकालाई ७१ रनले पराजित गरेको हो । स्कटल्याण्डले दिएको ३ सय १८ रनको लक्ष्य पछाएको अमेरिका ४४ ओभरमा अल आउट हुदै २ सय ४६ रन मात्र बनाएको थियो । अमेरिकाका लागि उत्कर्ष श्रीवास्तवाले सर्बाधिक ६७ रन बनाएका थिए भने कप्तान मोनाक पटेलले ५२ रन बनाएका थिए ।

त्यस्तै संजय कृष्णमुर्थीले ४९ रन बनाएका थिए । त्यसैगरी स्कटल्याण्डका बलर ज्याक जार्भिसले सर्बाधिक ४ विकेट लिए भने ब्राड कुरी र मार्क वाटले २/२ विकेट लिएका थिए । यस अघि टस हारेर पहिला ब्याटिंग गरेको स्कटल्याण्डले ५० ओभरमा ५ विकेट गुमाउदै ३१७ रन बनाएको थियो ।

स्कटल्याण्डका लागि ब्राण्डन म्याकुलनले १५१ रन बनाएका थिए ।