एएफसी यु–१७ एसिया कप छनोटः कतारसँग पराजित हुँदै बाहिरियो नेपाल

काठमाडौं । एएफसी यु–१७ एसिया कप छनोटअन्तर्गत नेपालले आयोजक कतारसँग ५–० गोल अन्तरले पराजित भएको छ ।

खेलको २१औँ मिनेटमा यजान मोहम्मदले गोल गर्दै घरेलु टिम कतारलाई सुरुवाती अग्रता दिलाएका थिए । त्यसपछि पहिलो हाफको इन्जुरी समयको चौथो मिनेटमा जैद फैसलले गोल गर्दै कतारको अग्रता दोब्बर पारे । पहिलो हाफमा २–० को अग्रता लिएको कतारले दोस्रो हाफमा थप तीन गोल गरेको थियो ।

खेलको ५५औँ मिनेटमा फैसलले गोल गर्दै कतारलाई ३–० को अग्रता दिलाए । त्यसपछि खेलको ६६औँ मिनेटमा ओमर अल मरजौकीले गोल गरेपछि कतार ४–० को स्थितिमा पुग्यो । खेलको ८३औँ मिनेटमा फैसलले ह्याट्रिक पूरा गरेपछि कतार नेपालमाथि ५–० को फराकिलो जित निकाल्न सफल भयो ।

लगातार दुई खेलमा पराजित भएपछि नेपाल एक खेलअघि नै छनोटबाट बाहिरिएको हो ।