यूईएफए नेसन्स लिगः इटाली, फ्रान्स र जर्मनी विजयी

एजेन्सी । रान्डल कोलो मुनिको दुई गोलको मद्दतले फ्रान्सले यूईएफए नेसन्स लिगमा सोमबार बेल्जियममाथि २–१ को रोमाञ्चक जित निकालेको छ ।

बेल्जियमका लागि लेस ओपेन्डाले पहिलो हाफको इन्ज्युरी समयमा एक गोल फर्काए । खेलको अन्तिम १४ मिनेट फ्रान्सले १० खेलाडीमा सीमित रहेर खेलेको थियो । अरेलिन चोमेनी दोस्रो पहेँलो कार्डमा मैदान छाड्न बाध्य रहे । निर्णायक गोल भने ६२ औं मिनेटमा सम्भव भएको थियो ।

लिग ए ग्रुप टुको अर्को खेलमा इटालीले इजरायललाई सजिलै ४–१ ले पराजित गरेको थियो । यस्तै लिग ए ग्रुप थ्रीको खेलमा हंगेरीले बोस्निया एन्ड हर्जगोभिनालाई २–० ले हरायो । त्यसै समूहको अर्को खेलमा जर्मनी नेदरल्यान्ड्समाथि १–० को जित निकाल्न सफल रह्यो ।

खेलको एक मात्र गोल जेमी लेवेलिङले ६४ औं मिनेटमा गरे ।