काठमाडौं । गएको असोज ११ र १२ गतेको अविरल बर्षापछि आएको बाढी र पहिरोले देशका मुख्य मुख्य राजमार्गहरु विग्रिएका छन् ।
जसले बडादशैंको मुखमा आफ्नो जन्मथलो फर्किने यात्रुहरुलाई सास्ती भइरहेको छ । अझै पनि देशको पुर्वी भागमा बर्षा भइरहेकाले पनि ढुक्क भएर यात्रा गर्न सक्ने अवस्थामा यात्रुहरु छैनन् । यस्तो अवस्थामा पनि दशैंका लागि संघिय राजधानी काठमाडौं छाडेर गाउँ फर्किनेहरुको संख्या बढिरहेको छ ।
नेपालीहरुको महान चाड बडा दशैंको सुरुवातसँगै विभिन्न काम र अध्ययनका लागि राजधानी काठमाडौं पसेकाहरु घर फर्किन थालेका कारण बालाजु, कलंकी लगायतका क्षेत्रहरुमा चहलपहल बढ्दै गएको छ । काठमाडौं उपत्यका ट्राफिक प्रहरी कार्यालयले दिएको जानकारी अनुसार यही असोज १४ गतेदेखि असोज १७ गते बिहानसम्म एक लाख २६ हजार ४ सय ३५ जनाले काठमाडौं छाडिसकेका छन् ।
घटस्थापना सुरु भएसँगै विद्यालयमा बिदा सुरु हुन थालेपछि नयाँ बसपार्कमा गाउँ फर्कनेहरुको भीड बढेको प्रहरीले जनाएको छ ।
प्रतिक्रिया