काठमाडौं । यातायात व्यवसायीहरुको मंगलबार बसेको बैठकले सार्वजनिक यातायातको अग्रिम टिकट बुकिङ बन्द नगर्ने निर्णय गरेको छ ।
साथै व्यवसायीले विपद् सम्बन्धी एवं बाटोको अवस्था बारेमा प्रहरीले फेसबुक पेजमार्फत निरन्तर अपडेट गर्नुपर्ने माग पनि राखेका छन्। मध्यम तथा लामो दूरीमा सञ्चालन हुने सार्वजनिक बसले अत्यावश्यकीय प्राथमिक स्वास्थ्य उपचारका सामग्री, खाने पानी तथा अत्यावश्यक अवस्थामा खान मिल्ने खानेकुरा राखेर मात्र सवारी सञ्चालन गर्ने भएका छन्।
यातायात व्यवसायीहरूले अहिलेको विषम परिस्थितिमा कुनै पनि हालतमा यात्रुलाई गन्तव्यसम्म पुर्याउन नसकिने बताएपछि मंगलबार यातायात व्यवस्था विभागले व्यवसायीलाई बोलाएर छलफल गरेको थियो।
यातायात व्यवस्था विभाग, नेपाल यातायात व्यवसायी राष्ट्रिय महासंघ, मजदुर संगठन, उपत्यका प्रहरी प्रभाग लगायतका सरोकारवाला निकायको बैठकले अग्रिम टिकट बुकिङ बन्द नगर्ने तर बाटोको अवस्था बुझेर मात्रै टिकट काट्ने निर्णय गरेको हो।
प्रतिक्रिया