झ्याप्लेखोला पहिरो अपडेटः हालसम्म ३ वटा गाडीबाट ३५ जनाको शव निकालियो

धादिङ । धादिङको झ्याप्लेखोलामा गएको पहिरोमा पुरिएर मृत्यु हुनेको संख्या ३५ पुगेको छ ।

पहिरोमा पुरिएका ३ वटा बसबाट हालसम्म ३५ जनाको शव निकालिएको प्रहरीले जनाएको छ । पहिरोमा अन्य गाडीहरू पनि पुरिएको आशंकामा खोजी कार्य जारी रहेको प्रहरीले जनाएको छ । प्रहरीका अनुसार चितवनबाट काठमाडौं आउँदै गरेको बा ३ ज १३४५ नम्बरको माइक्रो बस पहिरोमा पुरिएको अवस्थामा भेटिएको थियो ।

उक्त बसबाट १३ जनाको शव निकालिएको हो । त्यही पहिरोमा गोरखाबाट काठमाडौं आउँदै गरेको ना ४ ख २२७० नम्बरको यात्रुवाहक बस पनि पहिरोमा पुरिएको अवस्थामा फेला परेको छ । उक्त बसबाट ८ जनाको शव निकालिएको छ । त्यसैगरी बुटवलबाट काठमाडौं आइरहेको लु १ ज ४५७८ नम्बरको माइक्रोबस पहिरोमा पुरिँदा १४ जनाको मृत्यु भएको छ ।

माइक्रोबसबाट आठ पुरुष, पाँच महिला र एक बच्चाको शव निकालिएको प्रहरीले जनाएको छ ।