विश्वकप लिग–२ः अन्तिम खेलमा जित निकाल्ने दाउमा नेपाल

काठमाडौं । आईसीसी विश्वकप लिग–२ अन्तर्गत त्रिकोणात्मक सिरिजमा नेपालले आज अन्तिम खेल खेल्दैछ ।

क्यानडा भ्रमणमा रहेको नेपालले आज अन्तिम खेल ओमानसँग खेल्न लागेको हो । क्यानडाको ओन्टेरियोमा नेपाली समयअनुसार आज बेलुकी ८ः४५ बजे खेल शुरू हुनेछ। नेपालले क्यानडामा हालसम्म खेलेको तीन खेलमध्ये तीनै खेलमा पराजित भएको छ । घरेलु टोलीसँग २ र ओमानसँग १ खेल खेल्दा तीनै खेलमा नेपाल पराजित भएको हो ।

ओमानसँगको पहिलो खेलमा नेपाल एक विकेटले पराजित भएको थियो । विश्वकप लिग–२ मा नेपालले कुल ७ खेल खेलिसकेको छ । त्यसमध्ये नेपालले एउटा मात्रै जीत निकालेको छ । लगातार तेस्रो खेलमा पराजित नेपाललाई शृंखलाको अन्तिम खेल जित्दै खराब प्रदर्शनलाई रोक्ने अवसर छ । त्रिकोणात्मक टी–२० सिरिज खेलेपछि नेपाली टोली अमेरिका भ्रमणमा जानेछ । त्यहाँ नेपाल, अमेरिका र स्कटल्यान्डबीच खेल हुनेछ ।

अमेरिका भ्रमणमा पनि नेपालले लिग–२ को त्रिकोणात्मक सिरिज र टी–२० त्रिकोणात्मक सिरिज गरी दुई सिरिज खेल्नेछ ।