काठमाडौं । प्रधानमन्त्री केपी शर्मा ओली र भारतका प्रधानमन्त्री नरेन्द्र मोदीबीच न्युयोर्कमा द्विपक्षीय भेटवार्ता भएको छ ।
संयुक्त राष्ट्र संघको ७९ औं महासभाका क्रममा भएको ‘साइडलाइन’मा दुई देशका प्रधानमन्त्रीहरूबीच न्युयोर्कको लोते प्यालेसमा भेटवार्ता भएको हो । भेटमा भारतीय प्रधानमन्त्री मोदीले नेपालको भ्रमण छिट्टै गर्ने बताएको भेटवार्तामा सहभागी परराष्ट्रमन्त्री आरजु राणा देउवाले जानकारी दिइन् ।
साथै, द्विपक्षीय संयन्त्रहरूलाई सक्रिय बनाएर सबै समस्यालाई समाधान गर्ने विषयमा पनि उनीहरूबीच छलफल भएको छ । बैंठकपछि पत्रकारहरूसँग कुरा गर्दै प्रधानमन्त्री ओलीले मोदीसँगको भेटवार्ता राम्रो भएको उल्लेख गरे । भेटवार्तामा नेपालको तर्फबाट प्रधानमन्त्री ओली, परराष्ट्रमन्त्री राणा, प्रधानमन्त्रीका राजनीतिक मामिला सल्लाहकार विष्णु रिमाल, परराष्ट्र सचिव सेवा लम्साल र न्युयोर्कस्थित राष्ट्र संघका लागि स्थायी नियोगका प्रतिनिधि तथा राजदूत लोकबहादुर थापाको सहभागिता थियो ।
भारतको तर्फबाट प्रधानमन्त्री मोदीसँगै विदेशमन्त्री एस जयशंकर र विदेश मन्त्रालयका सचिव विक्रम मिस्री लगायतको उपस्थिति थियो । दुई पक्षबीच करिब ४५ मिनेट वार्ता चलेको थियो । बैंठकपछि परराष्ट्रका प्रवक्ता अमृतकुमार राईले दुई देश बीचको विश्वासको वातावरणलाई थप बलियो बनाउन द्विपक्षीय भेटवार्ताले थप सहयोग गरेको बताए ।
त्यसअघि प्रधानमन्त्री ओलीले भुटानका प्रधानमन्त्री दासो छिरिङ तोग्बे, कुवेतका राजकुमार एवं प्रधानमन्त्री शेख सबाह अल खलेद अल हमाद अल मुबारक अल सबाहसँग पनि भेटवार्ता गरेका थिए ।
प्रतिक्रिया