काठमाडौं । बर्नमाउथविरुद्ध ३–० गोल अन्तरको सहज जीत निकाल्दै लिभरपुल इंग्लिस प्रिमियर लिग फूटबलको शीर्ष स्थानमा उक्लिएको छ ।
शनिवार राति घरेलु मैदान एनफिल्डमा लिभरपुलले ११ मिनेटभित्र तीन गोल गरेको थियो । लुइस डियासले दुई तथा डार्विन नुनेजले एक गोल गरेका हुन् । खेलको २६औं मिनेटमा डियाजको गोलमार्फत लिभरपुलले अग्रता लिएको थियो । दुई मिनेटपछि डियाजले नै टोलीको अग्रता दोब्बर बनाए ।
त्यसपछि नुनेजले ३७औं मिनेटमा गोल गरेपछि लिभरपुल ३–० सहज जीत निकाल्यो । यस जीतसँगै शीर्ष स्थानमा उक्लिएको लिभरपुलले पाँच खेलमा १२ अंक जोडेको छ । एक खेल कम खेलेको म्यानचेस्टर सिटीसँग समान अंक भए पनि लिभरपुल गोल अन्तरमा अगाडि छ । पराजित बर्नमाउथ समान खेलबाट पाँच अंकका साथ १३औं स्थानमा छ ।
लिगअन्तर्गत शनिवार नै सम्पन्न अन्य खेलमा एस्टन भिल्लाले उल्भ्स, फुलहमले न्युक्यासल युनाइटेड र टोटनहमले ब्रेन्टफोर्डलाई समान ३–१ ले पराजित गरे । यसैगरी साउथह्याम्पटन र इप्सवीच टाउन तथा लेस्टर सिटी र एर्भटनले समान १–१ को बराबरीमा रोकिए ।
प्रतिक्रिया