पशुपति कोटिहोम महायज्ञको हिसाबकिताब सार्वजनिक, ७२ लाख भन्दा बढी घाटा भएको दाबी

काठमाडौं । ‘ऐतिहासिक श्री पशुपति कोटिहोम एवम् १०८ श्रीमद्भागवत विश्व कल्याण मासिक ज्ञान महायज्ञ’ को हिसाबकिताब सार्वजनिक गरिएको छ ।

बिहीबार पत्रकार सम्मेलन गर्दै कोटिहोम महायज्ञका आयोजक विजय कृष्णमूर्तिले कोटिहोममा कुल २० करोड १५ लाख ८२ हजार ४९० रुपैयाँ १५ पैसा बराबर नगद र द्रव्य दान संकलन भएको जानकारी दिए । कोटिहोम महायज्ञ आयोजनाका लागि २० करोड ८८ लाख ३२ हजार ७९४ रुपैयाँ ३८ पैसा खर्च भएको उनले बताए ।

उनले खर्च पनि त्यहिअनुसार भएको हुँदा घाटा भएको दाबी गरे । उनका अनुसार ७२ लाख ५० हजार ३०४ रुपैयाँ घाटा भएको छ । महायज्ञमा दिन्छु भनेर बचन दिएअनुसार डेढ करोडदेखि २ करोड रुपैयाँ उठ्न बाँकी रहेको समेत उनले बताए ।

शुरुदेखि विवादका बीच साउन महिनाभरी चलेको यज्ञमा स्वदेश तथा विदेशबाट लाखौँ भक्तजन दर्शनका लागि आएका थिए ।