तेस्रो टेस्टमा इंग्ल्यान्डमाथि श्रीलंकाको शानदार जित

एजेन्सी । तेस्रो तथा अन्तिम टेस्ट खेलमा घरेलु टोली इंग्ल्यान्डमाथि श्रीलंकाले ८ विकेटको शानदार जित हात पारेको छ ।

सोमबार जित्नका लागि आवश्यक २१९ रनको पछ्याएको श्रीलंकाले ४० दशमलव ३ ओभरमा २ विकेट गुमाउँदै लक्ष्य भेट्टायो । श्रीलंकाको जितमा ओपनर पाथुम निसंका १२४ बलमा १३ चौका र २ छक्कासहित १२७ रनमा नट आउट रहे । दिमुथ करुणारत्ने ८ र कुशल मेन्डिस ३९ रनमा आउट हुँदा एन्जिलो म्याथ्युज ३२ रनमा नटआउट रहे ।

इंग्ल्यान्ड दोस्रो इनिङमा १५६ रनमा अल आउट भयो । युवा विकेटकिपर जेमी स्मिथले सर्वाधिक ६७ र ड्यान लरेन्सले ३५ रन जोडे । अन्यको प्रदर्शन सम्झनलायक रहेन । पहिलो इनिङमा ६२ रनले पछि परेको श्रीलंकालाई उत्कृष्ट पुनरागमन गराउन लाहिरु कुमाराले ४, विश्व फेर्नान्डोले ३ र असिथा फेर्नान्डोले २ विकेट लिए ।

त्यसअघि पहिलो इनिङमा श्रीलंका २६३ रनमा अलआउट भएको थियो । श्रीलंकाका कप्तान धनन्जय डि सिल्भा ६९, कामिन्दु मेन्डिस र पाथुम निसांका ६४–६४ रन बनाए । इंग्ल्यान्डका जोश हुल र ओली स्टोनले ३–३ विकेट लिए । लन्डनमा टस हारेर पहिला ब्याटिङ थालेको इंग्ल्यान्ड ३२५ रनमा अलआउट भएको थियो । कप्तान ओली पोपले १५६ बलमा १९ चौका र २ छक्कासहित १५४ रनको शतकीय इनिङ खेलेपनि जित्न पर्याप्त रहेन ।

ओपनर बेन डकेटले ८६ रनको योगदान दिए । श्रीलंकाका मिलन रथानायकेले ३, विश्व फेर्नान्डो, लाहिरु कुमारा र धनन्जय डि सिल्भाले २–२ विकेट लिए । तीन टेस्ट खेलको सिरिजमा सुरुवाती दुई खेल इंग्ल्यान्डले ५ विकेट र १९० रनको जित हात पारेको थियो ।