ऐतिहासिक पदक विजेता पलेसालाई विमानस्थलमा भव्य स्वागत, नगर परिक्रमा गराइँदै

काठमाडौं । पेरिस पारा ओलम्पिकस्‌‌अन्तर्गत पारा तेक्वान्दोमा ऐतिहासिक कांस्य पदक विजेता पलेशा गोवर्धनसहित नेपाली पारा तेक्वान्दो टोली स्वदेश फर्किएको छ ।

टोलीलाई त्रिभुवन अन्तर्राष्ट्रिय विमानस्थलमा भव्य स्वागत गरिएको छ । उनलाई युवा तथा खेलकुदमन्त्री तेजुलाल चौधरीले स्वागत गरेका हुन् । यसपछि पलेशासहित नेपाली टीमलाई नगर परिक्रमा गराइने छ । राष्ट्रिय खेलकुद परिषद राखेपका अनुसार टोलीलाई नगरपरिक्रमा गराइने छ ।

र्‍याली एयरपोर्ट, गौशाला, पुरानो बानेश्वर, मैतीदेवी, डिल्लीबजार, बागबजार, भद्रकाली, शहीदगेट, त्रिपुरेश्वर चौक हुँदै राखेपको प्राङ्गणमा पुगेर टुंगिने छ । फ्रान्सको पेरिसमा भएको पारालिम्पिक्समा के ४४ क्याटगोरीअन्तर्गत महिला ५७ केजीमुनिको प्रतिस्पर्धामा पलेशाले ऐतिहासिक कांस्य जितेकी थिइन् ।

यो नै नेपाली खेलाडीले ओलम्पिकमा जितेको पहिलो पदक हो । पारा तेक्वान्दो खेलाडी पलेशाले सर्वियाकी मारिया मिसेभलाई १५–८ ले पराजित गर्दै कांस्य पदक जितेकी थिइन् ।