पशुपति कोटिहोमको समापनमा तनाव, आखिर के भएको थियो त्यस्तो ?

काठमाडौं । साउन महिनाभर चलेको पशुपति कोटिहोमको समापनको दिन गएराति तनाव सिर्जना भएको छ ।

गएराति पशुपतिमा साधा पोशाकमा आएका प्रहरीले कोटिहोम आयोजक विजय भण्डारीलाई पक्राउ गर्न खोजेपछि उनका समर्थकले प्रतिकार गरेका हुन् । स्वयम् भण्डारीले सामाजिक सञ्जाल फेसबुकमा लाइभ गर्दै सबै भक्तजनलाई पशुपतिमा आउन र प्रहरीको प्रतिकार गर्न आग्रह गरेका थिए ।

उनले पशुपति क्षेत्र अब रणमैदान भएको र नेपालमा पनि बंगलादेशको जस्तै विद्रोह सुरु भएको जस्ता भड्काउपूर्ण अभिव्यक्ति दिएका थिए । भण्डारीलाई पक्राउ गर्न आएको प्रहरी उनका समर्थकको अवरोधपछि रित्तो हात फर्किएको थियो । प्रहरीमाथि भण्डारीका समर्थकले हातपातसमेत गरेका थिए ।

प्रहरीले पनि सामान्य बल प्रयोग गर्दा केही घाइते भएको जनाइएको छ ।