एकदिवसीय सिरिजः तीन वर्षपछि श्रीलंकासँग पराजित भयो भारत

एजेन्सी । श्रीलंकाले भारतविरुद्धको जारी एकदिवसीय सिरिजको दोस्रो खेलमा ३२ रनको जित हासिल गरेको छ।

तीन खेलको एकदिवसीय सिरिजअन्तर्गत दोस्रो खेलमा जित निकालेसँगै घरेलु टोलीले सिरिजमा १–० को अग्रता बनाएको छ। यसअघि पहिलो खेल बराबरीमा सकिएको थियो। श्रीलंकाले भारतलाई २०२१ पछि पहिलो पटक पराजित गरेको हो। यसबिचमा श्रीलंकाले ६ खेल गुमाउँदा एक खेल बराबरीमा सकिएको छ।

श्रीलंकाको जितमा ६ विकेट लिएका लेग स्पिनर जफ्री भान्डर्से ‘म्यान अफ द म्याच’ घोषित भए । टस जितेर पहिले ब्याटिङ गरेको श्रीलंकाले निर्धारित ५० ओभरमा ९ विकेट गुमाएर २ सय ४० रन बनाएको थियो। उसका लागि कमिन्दु मेन्डीस र आभिष्का फर्नान्डोले समान ४०–४० रन बनाउँदा कुशल मेन्डीसले ३० रन र दुनिथ वेलालगेले ३९ रन बनाए।

वेलालगे र मेन्डीसले पछिल्लो क्रममाम उत्कृष्ट प्रदर्शन गरेका थिए। कप्तान चरिथा असलंकाले २५ रन बनाउँदा अकिल धनन्जय १५ रनमा आउट भए। २ सय ४१ रनको लक्ष्य पछ्याएको भारत राम्रो सुरुवातका बाबजुत ४२ दशमलव २ ओभरमा २ सय ८ रनमा समेटियो।