केरला पहिरो अपडेटः मृत्यु हुनेको संख्या ४७ पुग्यो, अझै सय जना पुरिएको हुनसक्ने आशंका

एजेन्सी । भारतको केरला राज्यको वायनाडमा पहिरोमा पुरिएर मृत्यु हुनेको संख्या ४७ पुगेको छ ।

यसमा अझै सय जना फसेको हुन सक्ने बताइएको छ । मृत्यु हुनेमा केही बालबालिका पनि छन् । उद्धार कार्यमा सेनाको साथसाथै जल सेना पनि खटाइएको छ । पहिरो मंगलबार बिहान करिब २ बजे खसेको थियो । त्यसपछि ४ः१० मा फेरि अर्को पहिरो पनि गयो । त्यहाँ करिब २–३ पटक पहिरो गएको बताइएको छ ।

पहिरोका कारण घाइते भएका १६ जनाको भने अस्पतालमा उपचार भइरहेको बताइएको छ । प्रधानमन्त्री नरेन्द्र मोदीले पहिरोमा परेर ज्यान गुमाउने मृतकका परिवारलाई प्रधानमन्त्री राहत कोषबाट २ लाख भारु क्षतिपूर्ति दिने घोषणा गरेका छन् ।

यसबाहेक घाइतेहरूलाई जनही ५० हजार भारु दिने घोषणा गरिएको छ ।