भारतको लगातार दोस्रो जित, यूएई ७८ रनले पराजित

एजेन्सी । महिला एसिया कपमा भारतले लगातार दोस्रो जित हासिल गरेको छ ।

आइतबार भएको समूह ए अन्तर्गत भएको खेलमा भारत ७८ रनले विजयी बनेको हो । भारतले पहिलो खेलमा पाकिस्तानलाई हराएको थियो । भारतले प्रस्तुत गरेको २ सय २ रनको लक्ष्य पछ्याउने क्रममा यूएईले निर्धारित २० ओभरमा ७ विकेट गुमाएर मात्र १ सय २३ रन बनाउन सक्यो । यूएईका लागि काभिसा एगोडेजले नटआउट रहँदै सर्वाधिक ४० रन जोडिन् ।

उनले मात्र ३२ बलमा ३ चौका र १ छक्का हिर्काइन् । त्यस्तै, ओपनर इशा ओजाले ३६ बलमा ३८ रनको योगदान दिइन् । खुसी शर्माले १३ बलमा १० रन बनाउन बाहेक अन्य ब्याटरले दोहोरो अङ्कमा रन जोड्न सकेनन् । भारतका लागि दीप्ति शर्माले २ तथा रेनुका सिंह, तनुजा कँवर, पूजा भस्त्राकर र राधा यादवले १–१ विकेट हासिल गरे ।

यसअघि पहिले ब्याटिङ गरेको भारतले निर्धारित २० ओभरमा ५ विकेटको क्षतिमा २ सय १ रन बनाएको थियो ।